Dathliad o wirfoddoli yn Sir Fynwy – y gorffennol, y presennol a’r dyfodol!

Ar ddydd Gwener, 7fed Chwefror 2025, cynhaliodd Cyngor Sir Fynwy ddigwyddiad i ddathlu gwirfoddoli yn Sir Fynwy o’r gorffennol,  y presennol a’r dyfodol.

Roedd y digwyddiad yn gydweithrediad rhwng Cyngor Sir Fynwy, Cymdeithas Tai Sir Fynwy a Bridges.

Croesawyd y digwyddiad i Neuadd y Sir gan Arweinydd y Cyngor y Cynghorydd Mary Ann Brocklesby, a dathlodd y digwyddiad gyfraniadau sylweddol gwirfoddolwyr yn Sir Fynwy, gan roi cyfle i gydweithio â sefydliadau partner a grwpiau cymunedol a mynegi diolchgarwch i’r gwirfoddolwyr am eu cefnogaeth amhrisiadwy.

Roedd y digwyddiad yn cynnwys siaradwyr gwadd: Jenny Powell o The Gathering yn y Fenni, Morgan Collins, gwirfoddolwr ifanc o MonLife, Bryn Probert o Hyb Cymorth i Gyn-filwyr Sir Fynwy, ac Alison Palmer, Dirprwy Gyfarwyddwr Cymdeithas Mudiadau Gwirfoddol Gwent. Cafodd y mynychwyr hefyd gyfleoedd i gwrdd â grwpiau a sefydliadau lleol, a chafwyd perfformiad gan Gôr Cymunedol Sir Fynwy.

Mae gwirfoddolwyr ar draws y sir yn chwarae rhan hanfodol yn y gymuned. O fewn gwasanaethau MonLife, rhwng Ebrill a Medi 2024, cymerodd 370 o wirfoddolwyr ran mewn 43 o gyfleoedd gwirfoddoli, gan gyfrannu 6,372 o oriau gyda gwerth economaidd o £86,2191. Roedd 19 o wirfoddolwyr Datblygu Chwaraeon a Hamdden wedi symud ymlaen i gael eu cyflogi  yn haf 2024.

Yn ystod y digwyddiad, cafodd y mynychwyr gyfle i gwrdd ac ymgysylltu â gwirfoddolwyr a sefydliadau eraill, gan gynnwys Uned Ymateb Cyntaf Draenogod, Cwtch Angels, Growing Spaces, Mind Sir Fynwy, Sgowtiaid Sir Fynwy, Coffi a Chyfrifiaduron Rhaglan, Sport In Mind, a Usk Track.

Dywedodd Arweinydd Cyngor Sir Fynwy, y Cynghorydd Mary Ann Brocklesby: “Mae gwirfoddolwyr o bob agwedd ar fywyd yn chwarae rhan bwysig yn ein cymunedau. Mae eu hymroddiad yn ein galluogi ni yn y Cyngor i ddarparu gwasanaethau ac amddiffyn y rhai mwyaf bregus yn ein cymuned. Ar ran y Cyngor a’n cymunedau, diolch am bob awr, munud ac eiliad rydych chi’n gwirfoddoli.”

Dywedodd Aelod Cabinet Cyngor Sir Fynwy dros Gydraddoldeb ac Ymgysylltu, y Cynghorydd Angela Sandles: “Gwirfoddolwyr yw curiad calon ein cymunedau. O’n gwirfoddolwyr 16 oed i’r hynaf sy’n 94, mae pob unigolyn yn dod â brwdfrydedd, egni, ac amrywiaeth o sgiliau i’w gweithgareddau. Nid oes ond angen i chi edrych ar werth economaidd gwirfoddolwyr i weld eu cyfraniad enfawr. Diolch i bob un ohonoch.”

I ddarganfod mwy am gyfleoedd gwirfoddoli, ewch i wefan Gwirfoddoli Cymru: www.gwirfoddolicymru.net

Dysgwch fwy am Wirfoddoli gyda MonLife yma www.monlife.co.uk/connect/volunteering/

Gala Nofio Ysgolion Uwchradd MonLife yn gwneud sblash

Daeth mwy na 50 o bobl ifanc o ysgolion uwchradd ar draws Sir Fynwy ynghyd yn ddiweddar i gymryd rhan yng Ngala Nofio Ysgolion Uwchradd MonLife, a gynhaliwyd am y tro cyntaf gan dîm Datblygu Chwaraeon MonLife yng Nghanolfan Hamdden Cas-gwent.

Roedd y digwyddiad yn arddangos sgiliau’r nofwyr ac yn rhoi cyfle gwerthfawr i ysgolion gasglu data asesu ar gyfer safoni TGAU Addysg Gorfforol.

Mae’r gala hon yn adeiladu ar y sylfaen lwyddiannus a osodwyd gan ein darpariaeth Nofio mewn Ysgolion Cynradd, gan sicrhau bod gwaddol o gyfleoedd nofio yn parhau i addysg uwchradd.

Rydym wedi ymrwymo i ehangu cyfranogiad mewn nofio y tu hwnt i oriau safonol y cwricwlwm, gan gynnig cyfle i fyfyrwyr ymwneud â’r gamp mewn amgylchedd cystadleuol.

Mae’r Gala Nofio yn nodi dechrau digwyddiad blynyddol, ac mae MonLife yn gyffrous i barhau i drefnu digwyddiadau chwaraeon amrywiol trwy gydol y flwyddyn academaidd.

Dywedodd Aelod Cabinet Cyngor Sir Fynwy dros Gydraddoldeb ac Ymgysylltu, Cyng Angela Sandles, “Roedd mynychu’r gala nofio yn brofiad gwych. Fel Cyngor, rydym wedi ymrwymo i ddarparu llwyfan i bobl ifanc gymryd rhan mewn amgylchedd cystadleuol a chyfeillgar. Llongyfarchiadau i bawb a gymerodd ran.”

“Rwy’n edrych ymlaen at weld datblygiadau pellach mewn digwyddiadau chwaraeon ysgol.”

I ddarganfod mwy am Dîm Datblygu Chwaraeon MonLife, ewch i: www.monlife.co.uk/cy/connect/sports-development/

Dathlu’r Nadolig yn Hyb Cil-y-coed

Cynhaliodd Cyngor Sir Fynwy ddigwyddiad dathlu yng Nghil-y-coed i roi sylw i’r holl waith da a wneir yn llyfrgelloedd yr ardal.

Hyb Cymunedol Cil-y-coed oedd lleoliad Dathliad Nadolig eleni.

Ddydd Iau 12 Rhagfyr, cynhaliodd y cyngor ddigwyddiad ar gyfer y gymuned ac aelodau’r llyfrgell, a gefnogwyd gan Gyfeillion y Llyfrgell.

Rhoddodd y dathliad blynyddol sylw i wasanaethau llyfrgell y sir – a chadarnhau’r ffaith fod llawer mwy na dim ond llyfrau yn eich llyfrgell leol. Mae Hybiau Sir Fynwy yn wasanaeth gyda ffocws ar y gymuned.

Cafwyd adloniant cerddorol gan Glybiau Canu Cas-gwent a Brynbuga, gyda detholiad o ganeuon Nadoligaidd – modern a thraddodiadol. Rhoddodd aelodau staff hefyd darlleniadau perthnasol i’r ŵyl.

Dywedodd y Cyng Angela Sandles, Aelod Cabinet Cydraddoldeb ac Ymgysylltu: “Ein llyfrgelloedd yw conglfaen ein cymunedau yn Sir Fynwy. Maent yn rhoi cymaint mwy na llyfrau i ni, mae hyn yn cynnwys gliniaduron i’w benthyg, lle i gwrdd, lle i astudio a dysgu, lle i gael cyngor a hefyd wrth gwrs i gynnal digwyddiadau cymdeithasol gwych tebyg i hwn.

“Mae’n bwysig ein bod yn parhau i werthfawrogi a defnyddio popeth y mae ein Hybiau a llyfrgelloedd a’r staff ynddynt yn ei gynnig i holl breswylwyr Sir Fynwy.”

Menter Noddi Llyfr yn cael ei lansio yn llyfrgelloedd Sir Fynwy

Mae llyfrgelloedd Sir Fynwy wedi lansio menter “Noddi Llyfr” i wella ymgysylltiad cymunedol. Gall trigolion nawr noddi llyfrau yn llyfrgelloedd Sir Fynwy drwy ein partneriaeth â Chyfeillion Llyfrgell Cil-y-coed.

Mae’r cynllun newydd yn galluogi pobl leol i gyfrannu’n uniongyrchol i’w llyfrgell drwy noddi teitlau newydd, gan sicrhau bod y silffoedd yn parhau’n fywiog ac yn llawn stoc ar gyfer holl aelodau’r gymuned.

Bydd y sawl sy’n noddi yn derbyn cydnabyddiaeth am eu haelioni gyda phlât llyfr a thystysgrif o werthfawrogiad am bob llyfr noddedig. Mae hyn yn rhoi cyfle i unigolion anrhydeddu cof ffrind neu anwyliaid wrth iddynt gyfrannu at gasgliad y llyfrgell. Croesewir rhoddion gan sefydliadau yn fawr hefyd.

Gall noddwyr sydd â diddordeb gymryd rhan drwy lawrlwytho’r ffurflen o’n gwefan a’i chyflwyno ochr yn ochr â thaliad arian parod neu siec yn daladwy i Gyfeillion Llyfrgell Cil-y-coed yn eich llyfrgell leol yn Sir Fynwy. Bydd eich cyfraniadau yn cefnogi’r gwaith o brynu llyfrau ar gyfer ein llyfrgelloedd yn uniongyrchol, er budd oedolion a phlant.

Sylwch, er y byddwn yn ymdrechu i osod llyfrau newydd mewn llyfrgelloedd lleol, nid oes sicrwydd y bydd rhoddion yn cael eu dyrannu i gangen arferol y rhoddwr.

Dywedodd y Cynghorydd Angela Sandles, Aelod Cabinet dros Gydraddoldeb ac Ymgysylltu Cyngor Sir Fynwy: “Mae’r fenter hon yn caniatáu i Lyfrgelloedd Sir Fynwy ddarparu’r gwasanaeth gorau posibl. 

Diolch i bawb sydd wedi noddi llyfr yn barod ac i’r rhai fydd yn ein noddi yn y dyfodol.

“Mae ein cydweithrediad â grwpiau cymunedol lleol, megis Cyfeillion Llyfrgell Cil-y-coed, yn dangos sut, fel Cyngor, ein bod am weithio gyda’r cymunedau yr ydym yn eu gwasanaethu. Diolch iddynt am eu hymroddiad i hyrwyddo’r gwasanaethau a helpu gyda’r rhaglen anhygoel hon.

I nodi’r fenter arwyddocaol hon, mynychodd aelodau’r gymuned a chynrychiolwyr etholedig lleol ddigwyddiad arbennig ddydd Llun, 18fed Tachwedd, lle buom yn dathlu llwyddiant yr ymgyrch “Noddi Llyfr” ac yn tynnu sylw at bwysigrwydd llyfrgelloedd cyhoeddus yn Sir Fynwy.

I gael rhagor o wybodaeth, ewch i www.monmouthshire.gov.uk/cy/hybiau-cymunedol-sir-fynwy/

Is-Gadeirydd Cyngor Sir Fynwy a Chadeirydd Chyfeillion Llyfrgell Cil-y-coed, Cyng. Peter Strong gyda chydwedd y Is-Gadeirydd Cyng.Jackie Strong

Digwyddiad casglu sbwriel cymunedol Afon Gafenni

Ail-lansiwyd Prosiect Afon Gafenni yn llwyddiannus gyda digwyddiad casglu sbwriel cymunedol yn Swan Meadows, Y Fenni, ar ddydd Gwener, 15fed Tachwedd 2024.

Roedd y digwyddiad, a drefnwyd mewn partneriaeth â Cadwch Gymru’n Daclus a thîm Afonydd Iach Groundwork Cymru, yn cynnwys cyfranogiad brwdfrydig gan aelodau’r gymuned leol.

Roedd y digwyddiad casglu sbwriel yn rhan o’r fenter ehangach i adfer bioamrywiaeth yn Afon Gafenni, cynyddu ymgysylltiad cymunedol, a chodi ymwybyddiaeth y cyhoedd o’i fanteision.

Gweithiodd yr unigolion   gyda’i gilydd i lanhau ardal yr afon, gan gyfrannu at amcanion y prosiect o wella’r afon a’i chynefinoedd cyfagos.

Nod Prosiect Afon Gafenni yw creu cynllun ymgysylltu cymunedol ar gyfer y camau adfer afonydd, gan ddarparu cyfleoedd gwirfoddoli, dysgu a hyfforddiant.

Mae’r prosiect yn amlygu pwysigrwydd yr Afon Gafenni ar gyfer bioamrywiaeth, addasu i newid hinsawdd a lles cymunedol.

Mae’r afon yn lle gwych i fyw, gweithio ac ymweld ag ef, gan gynnig cyfleoedd ar gyfer teithiau natur a chyfle i weld bywyd gwyllt syfrdanol fel glas y dorlan ac adar bronwen y dŵr.

Dywedodd y Cynghorydd Catrin Maby, Aelod Cabinet Cyngor Sir Fynwy dros Newid Hinsawdd a’r Amgylchedd: “Mae’n wych bod Prosiect Afon Gafenni yn cael ei ail-lansio. Diolch i bawb a fynychodd y digwyddiad casglu sbwriel. Gall pob un ohonom chwarae rhan gadarnhaol wrth effeithio adfer byd natur, waeth pa mor fach, ac edrychaf ymlaen at weld sut y bydd y prosiect hwn yn datblygu.”

I gael rhagor o wybodaeth am Brosiect Afon Gafenni a digwyddiadau yn y dyfodol,  e-bostiwchlocalnature@monmouthshire.gov.uk

Mae’r prosiect yn cael ei gyflwyno gan y Tîm Seilwaith Gwyrdd yn Monlife, gyda chefnogaeth Grid Gwyrdd Gwent drwy’r Gronfa Ffyniant Gyffredin a Phartneriaeth Natur Leol Sir Fynwy.

Pobl ifanc yn cael eu hysbrydoli mewn cynadleddau blynyddol i ddod yn arweinwyr y dyfodol

Mae disgyblion Sir Fynwy wedi cael eu hysbrydoli i ddod yn arweinwyr drwy chwaraeon, diolch i Gynadleddau Llysgenhadon Ifanc Efydd ddychwelyd.

Cynhaliwyd y gynhadledd eleni gan dîm Datblygu Chwaraeon MonLife, a chynhaliwyd dau ddiwrnod eleni, gyda digwyddiadau’n cael eu cynnal yng Nghanolfan Antur Awyr Agored Gilwern ac Ysgol Gynradd Thornwell.

Daeth y gynhadledd flynyddol â disgyblion Blwyddyn 6 ynghyd o ysgolion cynradd ledled Sir Fynwy, gan ganolbwyntio ar iechyd, lles, gweithgaredd corfforol ac arweinyddiaeth.

Drwy gydol y dydd, cymerodd y Llysgenhadon Ifanc ran mewn gweithdai amrywiol a ysbrydolwyd gan y fframwaith newydd gan Youth Sport Trust. Roedd hyn yn cynnwys themâu fel Ysbrydoli a Dylanwadu, Arwain a Mentora, yn ogystal ag ymgynghoriad chwarae a gemau ymarferol.

Ers ei sefydlu yn 2017, mae 6,287 o ddisgyblion wedi cymryd rhan yn rhaglen Playmaker Blwyddyn 5, gyda mwy na 409 yn symud ymlaen i gynrychioli eu hysgolion yn rhaglen Llysgenhadon Ifanc Efydd Blwyddyn 6.

Mae’r Rhaglen Llysgenhadon Ifanc Efydd yn nodi dechrau taith arweinyddiaeth llawer o bobl ifanc, gyda phedwar academi arweinyddiaeth bellach wedi’u sefydlu ym mhob ysgol gyfun yn Sir Fynwy.

Mae’r academïau yn atgyfnerthu negeseuon craidd y rhaglen ac yn cynnig cyfleoedd i gefnogi gweithgarwch corfforol mewn ysgolion a chymunedau lleol, gan hefyd ennill profiad gwirfoddoli amhrisiadwy.

Mae llwybr clir wedi’i greu i bobl ifanc wella eu sgiliau a sicrhau cyfleoedd cyflogaeth drwy’r Playmaker i lwybr cyflogaeth ôl-16.

Yn ogystal â’r llysgenhadon ifanc, roedd Cadeirydd Cyngor Sir Fynwy, Su McConnel, a’r Aelod Cabinet dros Gydraddoldeb ac Ymgysylltu, Angela Sandles yn bresennol yn y digwyddiad.

Dywedodd y Cynghorydd Sandles: ”O fynychu’r gynhadledd, roedd yn amlwg bod y rhaglen hon yn cael effaith sylweddol, nid yn unig o ran datblygu sgiliau arwain ond hefyd wrth greu ymdeimlad o gymuned a pherthyn.

“Roedd egni a chyffro’r plant yn amlwg, ac eiliadau fel y rhain sy’n ein hatgoffa o bwysigrwydd darparu cyfleoedd o’r fath i bobl ifanc ar draws Sir Fynwy”.

Am fwy o wybodaeth am y rhaglen Llysgennad Ifanc Efydd neu fentrau Datblygu Chwaraeon ehangach, ewch i – https://www.monlife.co.uk/cy/connect/sports-development/ neu e-bostiwch sport@monmouthshire.gov.uk.

Prosiect parc Cas-gwent yn llawn hwyl ar ôl sicrhau £100k o arian gan y Loteri Genedlaethol

Mae cais llwyddiannus am Gyllid gan y Loteri Genedlaethol wedi sicrhau £100,000 tuag at adfywio ardal chwarae Dell yng Nghas-gwent.

Sicrhawyd y cyllid gan y grŵp gwirfoddol Cyfeillion Parc y Dell Cas-gwent, mewn partneriaeth â Chyngor Tref Cas-gwent a Chyngor Sir Fynwy. Mae hyn yn golygu y dylid dechrau creu parc chwarae newydd yn gynnar y flwyddyn nesaf.

Mae hyn bellach yn dod â’r cyfanswm a godwyd ar gyfer y parc newydd i £225,000, gyda Chyngor Tref Cas-gwent eisoes wedi addo £100,000 a £25,000 wedi’i dderbyn gan Gyngor Sir Fynwy. Cyfrannodd y Cyngor Tref hefyd £13,000 ychwanegol tuag at ffioedd dylunio cychwynnol a chostau ar gyfer y cais cynllunio llwyddiannus.

Bydd y parc cyrchfan newydd yn cynnwys cael gwared ar yr offer chwarae hen ffasiwn presennol i wneud lle ar gyfer amgylchedd chwarae modern a mwy naturiol, gan ategu at wal hanesyddol y porthladd sy’n rhedeg ochr yn ochr â’r parc. Bydd clogfeini chwarae, siglenni hygyrch a chylchfan i gyd yn cael eu gosod, yn ogystal â llwybrau newydd, seddi a phlanhigion bywyd gwyllt.

Mae ysbrydoliaeth hefyd wedi’i gymryd o orffennol cyfoethog Cas-gwent, gan gynnwys cwch pren pwrpasol. Mae cynlluniau hefyd ar gyfer llithren ar thema castell yn rhedeg i lawr arglawdd y Dell, yn amodol ar sicrhau £70,000 ychwanegol. Mae’r grŵp ar hyn o bryd yn ymgymryd gydag ymdrechion cyllido torfol er mwyn talu am y nodwedd hon.

Dywedodd Vicky Burston-Yates, Cadeirydd CPDC: “Mae hon wedi bod yn foment fawr i’n grŵp. Rydym yn hynod ddiolchgar i’r Loteri Genedlaethol am weld gwerth y prosiect hwn ac i bawb arall sydd wedi ein cefnogi ar hyd y ffordd.

“Bydd y parc yn etifeddiaeth barhaol i Gas-gwent, ac rydym yn ymfalchïo’n fawr yn ein rôl wrth i’r cynllun ddwyn ffrwyth. Ni allwn aros i weld y parc yn llawn llawenydd a chwerthin am genedlaethau i ddod, ac i weld y buddion  ehangach y gobeithir y bydd yn eu rhoi i’n tref brydferth.”

Dywedodd y Cynghorydd Margaret Griffiths o Gyngor Tref Cas-gwent: “Mae’r Cyngor Tref wrth ei fodd bod y Loteri Genedlaethol wedi cydnabod yr angen am y parc hwn a’i fod yn cefnogi’r cyfraniad mawr a wneir gan drigolion Cas-gwent drwy’r praesept a godwyd gan Gyngor Tref Cas-gwent”.

Dywedodd y Cynghorydd Angela Sandles, Aelod Cabinet Cyngor Sir Fynwy dros Gydraddoldeb ac Ymgysylltu: “Mae’n wych clywed y bydd Parc y Dell nawr yn gallu gwasanaethu plant Cas-gwent am flynyddoedd i ddod.

“Mae wedi bod yn gyrchfan boblogaidd i deuluoedd ar hyd y blynyddoedd ond mae angen sylw yn ddiweddar.

“Bydd y gwaith hwn yn rhoi’r parc mewn sefyllfa dda i barhau’n gêm gyfartal boblogaidd i’r dref.”

I gyfrannu at sleid y grŵp Crowdfunder, ewch i’w tudalen JustGiving: justgiving.com/crowdfunding/friendsofthedellpark. Gallwch ddilyn hynt datblygiad y parc ar dudalen Facebook Cyfeillion Parc y Dell @friendsofthedellpark.