Arddangosfa newydd yn dal harddwch Afon Gwy

Mae arddangosfa newydd sy’n olrhain rhythmau a nawsau newidiol Afon Gwy, o’i tharddiad ym Mhumlumon i’r man lle mae’n cwrdd â’r Hafren yng Nghas-gwent, newydd agor yn Amgueddfa Cas-gwent.

Mae Llif – Afon Gwy o’i Tharddle i’r Môr yn arddangosfa bwysig newydd gan yr artist o Gymru, Lucy Burden.

Roedd cyfle preifat i weld yr arddangosfa ar 19 Chwefror, ac fe fu gwesteion yn mwynhau noson o sgyrsiau bywiog a meddylgar wedi’u sbarduno gan dirweddau atgofus Burden.

Mae gwaith Burden yn cysylltu ag Oriel Taith Gwy yr Amgueddfa, ac yn gwahodd ymwelwyr i ystyried sut mae canrifoedd o artistiaid wedi ymateb i olygfeydd dramatig Gwy. Mae ffilm fer gan Steve Bennett, a grëwyd yn ystod digwyddiadau dathlu 50 mlynedd Llwybr Dyffryn Gwy dan arweiniad Ruth Waycott, yn cyd-fynd â’r arddangosfa.

Roedd Cynghorydd Sir Fynwy, Peter Strong yn y digwyddiad. Meddai: “Mae ymwelwyr wedi bod yn teithio i’r dyffryn hwn ers canrifoedd, gan chwilio am dro hardd yn yr afon neu glogwyn dramatig sydyn. Mae paentiadau Lucy yn cario’r llinach honno ymlaen – nid i ailadrodd, ond fel darlleniad modern.”

Datblygwyd yr arddangosfa gyda chefnogaeth gan Dyffryn Gwy Tirwedd Cenedlaethol, Partneriaeth Llwybr Dyffryn Gwy, ac Amgueddfeydd Sir Fynwy. Ar ôl Cas-gwent, bydd Llif / Flow yn teithio i The Pavilion, Castle Grounds, Henffordd gyda gwaith ychwanegol i ehangu’r gyfres.

Meddai Aelod Cabinet Cyngor Sir Fynwy dros Faterion Gwledig, Tai a Thwristiaeth, y Cynghorydd Sara Burch: “Mae Dyffryn Gwy wedi bod yn denu twristiaid ac artistiaid i’n rhanbarth ers blynyddoedd.

“Buaswn i’n annog pawb sy’n gallu ymweld â’r arddangosfa hon i weld harddwch Gwy wedi’i chrisialu mewn ffordd odidog.

“Mae’r arddangosfa yn rheswm gwych arall i ymweld ag Amgueddfa Cas-gwent, y dref yn ei chyfanrwydd a Sir Fynwy ei hun.

“Trwy ein Strategaeth Ddiwylliannol rydyn ni’n awyddus i gynnig mwy o gyfleoedd i artistiaid arddangos, gan ddod â gwaith newydd, cyffrous i Sir Fynwy.”

Bydd Llif / Flow i’w gweld yn Amgueddfa Cas-gwent hyd nes 9 Mehefin.

Maes pob tywydd yng Nghanolfan hamdden Cil-y-coed i gael ei adnewyddu

Mae Cyngor Sir Fynwy yn falch iawn o gyhoeddi uwchraddiad sylweddol i’r cae pob tywydd yng Nghanolfan Hamdden Cil-y-coed, gan nodi cam cyffrous ymlaen i chwaraeon cymunedol yn yr ardal.

Bydd y prosiect yn gweld yr wyneb synthetig 2G presennol yn cael ei ddisodli gan gae 3G o’r radd flaenaf, a fydd yn darparu profiad chwarae mwy diogel, gwydn ac o ansawdd uchel i ysgolion, clybiau a thrigolion lleol.

Mae’r buddsoddiad hwn yn rhan o ymrwymiad parhaus y cyngor i wella cyfleusterau chwaraeon a chwarae, gan greu mannau bywiog a hygyrch sy’n ysbrydoli cyfranogiad a mwynhad i bob oedran.

Mae’r datblygiad yn bosibl diolch i gefnogaeth partneriaid cyllido allweddol: Sefydliad Pêl-droed Cymru, Chwaraeon Cymru, a chyfraniadau gan y sector addysg.

Er mwyn sicrhau’r buddsoddiad hwn, mae’r prosiect yn dangos angen clir i’r gymunedol ac ysgolion, mynediad cymunedol y tu allan i oriau ysgol, a chydymffurfiad â safonau technegol 3G a gymeradwywyd gan FA Cymru/FIFA.

Mae cyfanswm o £456,000 wedi’i sicrhau ar gyfer y gwaith adnewyddu, gan gynnwys:

· £206,000 o Raglen Cyfleusterau FitForFuture Sefydliad Pêl-droed Cymru, sy’n cefnogi twf pêl-droed ar lawr gwlad ledled Cymru.

· £150,000 o Grant Cyfalaf Chwaraeon Cymru, sy’n helpu i ddarparu cyfleusterau chwaraeon cynaliadwy, modern a hygyrch.

Disgwylir i’r gwaith adeiladu ddechrau’r mis hwn, gyda tharged o gwblhau erbyn Ebrill 2026. Bydd diweddariadau’n cael eu rhannu trwy gydol y prosiect trwy dudalen pwrpasol – www.monlife.co.uk/caldicot-leisure-centre-development/ – a thrwy sianeli cyfryngau cymdeithasol Sir Fynwy a MonLife.

Dywedodd y Cyng. Angela Sandles, Aelod Cabinet Cyngor Sir Fynwy dros Gydraddoldeb ac Ymgysylltu: “Bydd y cyfleusterau hyn wedi’u huwchraddio’n hwb enfawr i’r dref a thu hwnt.

“Bydd y cae newydd ar gael i ddisgyblion ysgol yn ystod oriau ysgol, clybiau a thimau pêl-droed lleol, grwpiau chwaraeon cymunedol, ac aelodau o’r cyhoedd.

“Bydd hefyd yn galluogi mwy o gyfranogiad i fenywod a merched mewn amrywiaeth o chwaraeon a bydd yn ased gwych i Gil-y-coed a’r ardal ehangach.”

Dywedodd Cyfarwyddwr Sefydliad Pêl-droed Cymru, Aled Lewis: “Mae Sefydliad Pêl-droed Cymru wedi ymrwymo i fuddsoddi mewn cyfleusterau sy’n ysbrydoli cymunedau. Bydd y prosiect hwn yng Nghanolfan Hamdden Cil-y-coed yn hanfodol ar gyfer twf pêl-droed yn yr ardal leol.

“Diolch yn fawr i’n partneriaid, Llywodraeth y DU a Chwaraeon Cymru am gefnogi’r gwaith o ddatblygu’r cyfleuster newydd hwn – trwy gydweithio, rydym yn gwneud camau enfawr wrth wella cyfleusterau pêl-droed yng Nghymru ar y cae ac oddi arno.”

Pennod newydd i adeilad hanesyddol yn Nhrefynwy

Bydd Cyngor Sir Fynwy yn dechrau ar y gwaith ar wella Neuadd Sirol yn Nhrefynwy.

Er mwyn cyflawni’r weledigaeth uchelgeisiol hon, bydd Neuadd Sirol yn cau i’r cyhoedd dros dro o 20 Rhagfyr 2025, er mwyn caniatáu i’r gwaith hanfodol ddechrau. Disgwylir i’r adeilad aros ar gau i’r cyhoedd tan yn gynnar yn 2027.

Gyda chefnogaeth buddsoddiad o £2.8 miliwn, gan gynnwys £1.5 miliwn gan Gronfa Dreftadaeth y Loteri Genedlaethol, bydd y prosiect hwn yn gweld Neuadd Sirol yn cael ei hadfywio fel amgueddfa gymunedol ysbrydoledig a chanolfan ddysgu ddeinamig.

Beth sy’n Newid?

• Bydd Neuadd Sirol ar ei newydd yn cynnig arddangosfeydd arloesol yn dweud stori Trefynwy, mannau dysgu hyblyg, storfeydd i wrthrychau gweladwy a chyfleusterau gwella ar gyfer ein casgliadau sy’n arwyddocaol yn rhyngwladol.
• Bydd gwelliannau i’r system wresogi ac effeithlonrwydd ynni’n gwella cynaliadwyedd amgylcheddol, gan leihau ôl-troed carbon yr adeilad rhestredig Gradd I yma.
• Bydd mannau manwerthu wedi eu hailddylunio a chroeso newydd i ymwelwyr yn gwella’r profiad i bawb, gan gefnogi adfywiad Trefynwy a’r Cynllun Rheolaeth Cyrchfannau.
• Bydd y prosiect yn dileu rhwystrau corfforol, ariannol a chymdeithasol at fynediad, gan sicrhau fod Neuadd Sirol yn lle croesawgar i bawb.

Mae ymgynghoriad helaeth ag ystod eang o gymunedau, gan gynnwys grwpiau lleiafrifoedd ethnig ac unigolion sy’n byw gyda dementia, wedi llunio’r prosiect.

Mae mentrau fel prosiectau Casgliadau Dynamig a Chymru Wrth-hiliol eisoes wedi arwain at arddangosfeydd wedi’u curadu ar y cyd a phrofiadau amgueddfeydd mwy cynhwysol. Bydd Panel Dinasyddion yn parhau i lywio arddangosfeydd a digwyddiadau yn y dyfodol, gan sicrhau cynrychiolaeth gymunedol barhaus.

Dywedodd Aelod Cabinet Cyngor Sir Fynwy dros Faterion Gwledig, Tai a Thwristiaeth, y Cyng. Sara Burch: “Mae Neuadd Sirol wedi gwasanaethu Mynwy mewn sawl ffordd dros ei hanes, yn fwyaf diweddar fel lle i bobl yr effeithiwyd arnynt gan lifogydd ddod i gael cefnogaeth. Rydym yn edrych ymlaen at ei dyfodol fel amgueddfa gymunedol gyffrous, gan adrodd straeon niferus Trefynwy a dangos ein casgliadau pwysig yn rhyngwladol.”

Tra bod Neuadd Sirol ar gau, byddwn yn hysbysu’r gymuned ac yn ymgysylltu trwy ddiweddariadau rheolaidd a mewnwelediadau y tu ôl i’r llenni i’r trawsnewidiad.

Rydym yn edrych ymlaen at groesawu ymwelwyr yn ôl yn 2027 i Neuadd Sirol sy’n fwy bywiog, cynhwysol a chynaliadwy nag erioed o’r blaen.

Am ragor o wybodaeth a diweddariadau, ewch i www.monlife.co.uk/cy/heritage/the-shire-hall/

MonLife yn dathlu cydnabyddiaeth genedlaethol yng Ngwobrau 10 mlynedd Bwyd a Hwyl

Mae Cyngor Sir Fynwy yn falch iawn o gyhoeddi bod MonLife, tîm Chwaraeon, Chwarae a Chymunedau’r cyngor, wedi cael ei gydnabod yng Ngwobrau Dathlu 10 Mlynedd Bwyd a Hwyl.

Cynhaliwyd y gwobrau gan Gymdeithas Llywodraeth Leol Cymru, i nodi degawd o’r Rhaglen Cyfoethogi Gwyliau Ysgol Bwyd a Hwyl, gan ddathlu cyfraniadau eithriadol unigolion, sefydliadau a phartneriaethau wrth gefnogi plant a theuluoedd ledled Cymru yn ystod gwyliau’r ysgol dros yr haf.

Cyrhaeddodd MonLife, sydd wedi cydlynu’r rhaglen Bwyd a Hwyl yn Sir Fynwy am y pum mlynedd diwethaf, restr fer Gwobr Hyfforddwr Chwaraeon, sy’n cydnabod sefydliadau sy’n darparu gweithgarwch corfforol mewn ffyrdd arloesol, gan sicrhau bod anghenion pob plentyn wrth wraidd cynllunio.

Diolch i ymroddiad a chydweithrediad y tîm Chwaraeon, Chwarae a Chymuned, enwyd MonLife yn enillydd y Wobr Hyfforddwr Chwaraeon.

Mae’r rhaglen Bwyd a Hwyl yn Sir Fynwy wedi’i seilio ar fodel canolbwynt cadarn, sy’n rhoi cyfle i blant a phobl ifanc fynychu tair wythnos o weithgareddau gwyliau’r haf. Bob dydd, mae cyfranogwyr yn derbyn brecwast maethlon a chinio poeth, ochr yn ochr â rhaglen amrywiol o chwaraeon, chwarae a gweithgareddau cyfoethogi. Mae’r dull hwn yn sicrhau bod plant nid yn unig yn cadw’n weithgar ac yn brysur, ond hefyd yn elwa o brydau iach yn ystod y gwyliau.

Aeth cydnabyddiaeth bellach i Amanda Davies, Arweinydd Safle Ysgol Gynradd Thornwell yng Nghas-gwent, a enwyd yn ail ar gyfer y Wobr Cyfraniad Eithriadol. Mae Amanda, a ddechreuodd fel Cynorthwyydd Safle Gwyliau, wedi bod yn eiriolwr angerddol dros y rhaglen Bwyd a Hwyl ers ei sefydlu. Mae ei hymrwymiad a’i harbenigedd wedi cael effaith sylweddol ar y gymuned.

Dywedodd Aelod Cabinet Cyngor Sir Fynwy dros Gydraddoldeb ac Ymgysylltu, y Cynghorydd Angela Sandles: “Roeddwn wrth fy modd yn mynychu ac yn gweld tîm anhygoel MonLife yn cael ei gydnabod yng Ngwobrau Dathlu 10 Mlynedd Bwyd a Hwyl CLlLC yng Nghaerdydd, gan ennill Gwobr yr Hyfforddwr Chwaraeon am eu gwaith gwych yn annog plant a phobl ifanc i fod yn egnïol a mwynhau chwaraeon.”

“Rwyf hefyd mor falch o Amanda Davies, sy’n arwain rhaglen Bwyd a Hwyl Ysgol Thornwell yng Nghas-gwent ac a enwyd yn ail ar gyfer y Wobr Cyfraniad Eithriadol. Mae angerdd ac ymrwymiad Amanda i’r cynllun Bwyd a Hwyl yn disgleirio ym mhopeth y mae’n ei wneud, mae hi’n hyrwyddwr gwirioneddol o’r gwahaniaeth cadarnhaol y mae’n ei wneud i’n pobl ifanc a’u teuluoedd.”

Helpwch i ffurfio dyfodol diwylliannol Sir Fynwy 

Mae Cyngor Sir Fynwy newydd lansio ymgynghoriad newydd, a fydd yn mynd tan ddydd Sul, 14 Rhagfyr 2025, o gylch thema diwylliant a gweithgareddau diwylliannol yn y sir. 

Mae ymgynghoriad Siarad am Ddiwylliant yn gofyn am eich meddyliau a’ch syniadau i helpu i lunio’r Strategaeth Ddiwylliannol arfaethedig ar gyfer Sir Fynwy rhwng 2025 a 2035. 

Os ydych chi’n ymwneud â gweithgareddau diwylliannol neu os oes gennych ddiddordeb mewn gweithgareddau diwylliannol fel celf, perfformio, drama, cerddoriaeth, crefftau, neu hanes, neu os oes gennych farn am yr hyn y dylai byd diwylliannol Sir Fynwy ei gwmpasu, rydym yn eich annog i gymryd rhan yn yr ymgynghoriad. 

Bydd y wybodaeth y bydd yr arolwg ymgynghori yn ei chasglu yn helpu i lunio Strategaeth Ddiwylliannol arfaethedig y cyngor gyda’r nod o sbarduno newid cadarnhaol ar draws y sir a gwneud diwylliant yn fwy cynhwysol, hygyrch a gweladwy i bawb yn Sir Fynwy. 

Dywedodd y Cynghorydd Sara Burch, yr Aelod Cabinet sy’n gyfrifol am ddiwylliant: “Mae diwylliant yn rhan annatod o’r sir a’i hunaniaeth. Mae’n rhoi profiadau creadigol ar y cyd lle gallwn fynegi, dysgu a myfyrio ar ein hanes, ein lle, materion cymdeithasol a’n bywydau personol. Gall y profiadau hyn wella ein lles, cryfhau cymunedau a helpu i ddatblygu sgiliau bywyd hanfodol ar gyfer cyflogaeth a gwell ansawdd bywyd. 

“Mae diwylliant yn perthyn i bawb, ac felly hefyd y strategaeth a’r cynllun gweithredu hwn. P’un a ydych chi’n berfformiwr, yn grëwr, yn ymwelydd, yn aelod o’r gynulleidfa neu’n ennill eich bywoliaeth trwy’r diwydiannau diwylliannol rydym am glywed gennych. Beth sy’n dda? Beth allai fod yn well? Rhannwch eich barn a gweithiwch gyda ni ar gyfer dyfodol bywiog Sir Fynwy” 

Gallwch ddysgu mwy am yr ymgynghoriad a sut i gymryd rhan drwy ymweld â llwyfan ymgysylltiad y cyngor, Sgwrsio Am Sir Fynwy erbyn 23.59 o’r gloch ddydd Sul 14 Rhagfyr. 

Ffyrdd eraill o gymryd rhan: Gallwch hefyd gasglu (a dychwelyd) arolygon papur yn unrhyw un o Hybiau Cymunedol y cyngor, Amgueddfa Cas-gwent, Canolfan Groeso Cas-gwent, Amgueddfa’r Fenni a Borough Theatre. 

Dysgwch fwy yn www.sgwrsioamsirfynwy.co.uk/diwylliant  

Creadigrwydd amdani yng Ngwyl Gelf Cil-y-coed

Bydd Castell Cil-y-coed yn safle gŵyl gelf rhad ac am ddim fis nesaf. Bydd yn gweld rhai o artistiaid mwyaf talentog Sir Fynwy yn ymuno i ddathlu creadigrwydd gyda mynychwyr yr ŵyl ddydd Sadwrn 4 Hydref 2025. 

Bydd y digwyddiad teuluol, a gynhelir rhwng 11am a 4pm, yn cynnwys llu o weithgareddau i bobl eu mwynhau, gan eu hannog i fod yn greadigol a chael hwyl. 

Ar gyfer y rhai sydd eisiau rhoi cynnig arni, bydd sesiwn darlunio a pheintio awyr agored, murlun cymunedol byw i gyfrannu eto yn ogystal ag arddangosiadau gan artistiaid ac eraill a chyfleoedd eraill i roi cynnig ar gweithgareddau celf a chreadigol newydd. Bydd angen i’r rhai sy’n dymuno cymryd rhan yn y sesiwn awyr agored ddod â: phapur, bordyn i osod y papur arno, pensiliau, paent dyfrlliw, brwshys, dŵr mewn jar, stôl i eistedd arni ac îsl os oes ei hangen. 

Caiff plant gyfle i greu celfweithiau mawr o bethau y maent yn dod o hyd iddynt, rhoi cynnig ar lythrennu graffiti a chymryd rhan mewn cystadleuaeth gelf ‘arwyr lleol’. 

I gymryd rhan, gofynnir i bobl ifanc 5-11 oed feddwl am berson lleol, lle neu stori sy’n eu hysbrydoli, a darlunio, peintio, argraffu, torri neu lynu eu syniadau ar ddarn o gerdyn A4. Mae angen ysgrifennu enwau ac oedran yn glir ar y cefn a rhaid cyflwyno pob cais i’r castell erbyn 2pm ar y dydd. Cyhoeddir enw’r enillydd am 3pm. Bydd y sawl sy’n cymryd rhan yn cael cyfle i ennill bwndel creadigol cyffrous. 

Yn ogystal â gweithdai a gweithgareddau, cynhelir amrywiaeth o berfformiadau gan gerddorion a grwpiau lleol, yn ogystal ag arddangosiadau gan artistiaid, yn nhir hardd y castell. Ar gyfer y rhai sy’n dymuno cael lluniaeth, bydd yr ystafell te ar agor i weini diodydd twym a theisennau drwy’r dydd. 

Dywedodd y Cyng Sara Burch, Aelod Cabinet Cyngor Sir Fynwy dros Faterion Gwledig, Tai a Thwristiaeth: “Mae gan Sir Fynwy gymuned greadigol sydd wedi sefydlu’n dda ac sy’n gwneud cyfraniad gwerthfawr. Mae eu gwaith yn ysbrydoli pobl o bob oed ac mae’n wir yn helpu i hyrwyddo’r sir. Mae’n amlwg iawn fod creadigrwydd yn ffynnu ar draws Sir Fynwy, ac yn sicr yng Nghil-y-coed, fel y bydd yr ŵyl gelf hon yn ddangos. 

“Fedra i ddim aros i weld y castell yn llawn o artistiaid lleol a theuluoedd, i gyd yn dathlu’r diwylliant gwych a welwn bob dydd ar draws y sir.” 

Os hoffech gymryd rhan fel artist neu berfformiwr neu os oes gennych syniad am sut i gefnogi’r gymuned greadigol leol, anfonwch e-bost at: 

katherinemcdermidsmith@monmouthshire.gov.uk. 

Caiff y digwyddiad ei ariannu gan Lywodraeth y DU drwy’r Gronfa Ffyniant Gyffredin a’i threfnu gan Gyngor Sir Fynwy.  

Gadewch i Ni Sgwrsio am feysydd chwarae yng Nghas-gwent

Dewch i ddweud eich dweud ar gynlluniau Cyngor Sir Fynwy i drawsnewid dau faes chwarae yng Nghas-gwent.

Mae’r Cyngor wedi derbyn cyfran gyfyngedig o’r £5 miliwn a ddyrannwyd gan Lywodraeth Cymru ar gyfer gwella meysydd chwarae a chyfleusterau chwarae. Ar ôl adolygu data lleol a’r meini prawf ariannu, mae dau barc yng Nghas-gwent, Western Avenue a Pharc Bulwark, wedi’u clustnodi ar gyfer gwaith gwella.

Nid hwyl yn unig yw chwarae ond mae’n rhan hanfodol o ddatblygiad a thwf plentyn. Mae’n meithrin hyder, yn meithrin gwydnwch ac yn hybu hunan-barch, a hynny i gyd wrth feithrin perthnasoedd agosach o fewn teuluoedd a chymunedau.

Hoffem glywed eich barn nawr ar y gwaith uwchraddio arfaethedig. Bydd eich barn yn ein helpu i ddeall anghenion a dewisiadau’r cymunedau lleol.

Dywedodd Aelod Cabinet Cyngor Sir Fynwy dros Gydraddoldeb ac Ymgysylltu, y Cynghorydd Angela Sandles: “Bydd eich barn yn ein helpu i lunio datblygiad y ddau barc yng Nghas-gwent.

“Fel Cyngor, ein nod yw datblygu’r parciau i ddarparu’r cyfleoedd gorau i’r plant feithrin hyder a chael amser gwych ar yr un pryd.”

Dros yr haf, fel rhan o’r ymgynghoriad, byddwn yn siarad â’r plant a’r bobl ifanc sy’n cymryd rhan yng ngweithgareddau haf MonLife i gasglu eu barn ar y cynlluniau.

I rannu eich barn, ewch i Gadewch i Ni Sgwrsio am Sir Fynwy cyn 19eg Medi i lenwi’r arolwg: http://www.sgwrsioamsirfynwy.co.uk/ymgynghoriad-meysydd-chwarae-cas-gwent

Mae Cyngor Sir Fynwy eisiau adborth y cyhoedd ar lwybr teithio llesol newydd yng Nghil-y-coed

Mae Cyngor Sir Fynwy yn datblygu cynlluniau ar gyfer llwybr Teithio Llesol newydd sy’n mynd drwy ran o Barc Gwledig Castell Cil-y-coed.

Nod Llwybr Aml-ddefnyddiwr Cil-y-coed yw cysylltu llwybr Teithio Llesol Cysylltiadau Cil-y-coed/Llwybr Glas sydd newydd ei adeiladu â ffordd wasanaeth tarmac y Parc Gwledig, gan greu llwybr hygyrch a thawel i gerddwyr, beicwyr a phobl sy’n teithio o gwmpas o Borthsgiwed i ganol tref Cil-y-coed.

Mae’r llwybr wedi’i gynllunio i annog mwy o bobl i ddewis teithio llesol ar gyfer teithiau bob dydd, gan helpu i leihau traffig, gwella ansawdd aer a chefnogi ffyrdd o fyw iachach. Bydd hefyd yn gwella mynediad i’r Parc Gwledig, gan ei gwneud hi’n haws i drigolion ac ymwelwyr fwynhau treftadaeth naturiol a diwylliannol yr ardal.

Mae’r Cyngor nawr eisiau clywed gan drigolion i gasglu syniadau ar gyfer y llwybr.

Hoffai Cyngor Sir Fynwy glywed gennych os ydych chi’n byw yng Nghil-y-coed, Porthsgiwed, Sudbrook, Rogiet, Caerwent a’r ardaloedd cyfagos. Ein nod yw cyrraedd defnyddwyr presennol a defnyddwyr newydd posibl llwybrau teithio llesol yn yr ardal i ddarganfod beth hoffech chi ei weld ar hyd y llwybr.

Gallwch gyflwyno eich syniadau drwy gymryd rhan yn arolwg ar-lein y prosiect, a fydd yn cael ei gynnal drwy gydol mis Awst, ac sydd ar gael yn y cyfeiriad gwe canlynol: www.sgwrsioamsirfynwy.co.uk/

Bydd yr arolwg ar gael ar-lein am bedair wythnos rhwng 1af Awst a’r 31ain Awst.

Bydd y Cyngor hefyd yn cynnal dau ddiwrnod galw heibio cyhoeddus lle gallwch weld copïau caled o’r cynlluniau, siarad ag aelodau o dîm y prosiect a gadael sylwadau, a hynny ar y dyddiau canlynol:

• 11am i 4pm, dydd Sul 10fed Awst 2025, ym Mharc Gwledig Castell Cil-y-coed
• 9am i 5pm, dydd Llun 11eg Awst 2025, yng Nghanolfan Hamdden Cil-y-coed

Ar ôl i’r cyfnod ymgynghori cyhoeddus ddod i ben, bydd yr holl ymatebion yn cael eu dadansoddi, a bydd adroddiad yn cael ei greu ac ar gael i’r cyhoedd ar y dudalen we a nodir uchod.

Dywedodd y Cynghorydd Sara Burch, Aelod Cabinet Cyngor Sir Fynwy dros Faterion Gwledig, Tai a Thwristiaeth: “Mae hwn yn gam cyffrous arall i wella llwybrau ar gyfer cerdded a theithio ar draws Glan Hafren.

“Rwyf eisoes yn clywed pa mor bwysig yw’r Llwybr Gwyrdd newydd i rieni â phlant ar sgwteri ac mewn cadeiriau gwthio a defnyddwyr sgwteri symudedd, ymhlith eraill.

“Mae llawer o waith wedi’i wneud i ddylunio cam nesaf y llwybr, gan ei wneud yn hygyrch ac yn apelgar wrth barchu ecoleg ac archaeoleg unigryw Castell a Pharc Gwledig Cil-y-coed.

“Rydym sicrhau bod pob dim yn gywir, ac felly, rydym yn annog pob preswylydd i edrych ar y cynlluniau a dweud eich dweud. Os oes gennych syniadau, rydym am eu clywed.”

Statws Baner Werdd i atyniadau Sir Fynwy

Mae Cyngor Sir Fynwy yn falch iawn o gyhoeddi bod ein hatyniadau a’n mannau agored yn parhau i gael cydnabyddiaeth, gyda Gwobr y Faner Werdd.

Mae’r wobr hon yn rhoi cydnabyddiaeth i leoliadau sy’n cynnig cyfleusterau rhagorol ac ymrwymiad parhaus i wasanaeth o ansawdd uchel.

Ar draws Sir Fynwy, cafwyd Gwobrau’r Faner Werdd ar gyfer:

· Parc Cefn Gwlad Rhosied – derbynnydd gwobr ers 2024

· Hen Orsaf Tyndyrn – derbynnydd gwobr ers 2009

· Castell a Pharc Gwledig Cil-y-coed, wedi’i anrhydeddu ers 2013

· Dolydd y Castell, Y Fenni, ers 2014

Cafodd 12 Safle Cymunedol eraill eu cydnabod â Gwobr Gymunedol y Faner Werdd, gan gynnwys:

· Parc Bailey

· Gardd Busy Bees

· Dolydd Caerwent

· Gardd Gymunedol Cil-y-coed

· Dôl Crug

· Rhandiroedd Crucornau

· Gardd Gymunedol Goetre

· Bwyd Bendigedig Brynbuga

· Perllan Gymunedol Laurie Jones

· Parc Mardy

· Pentref Cyfeillgar i Fywyd Gwyllt Rhosied

· Y Maes Ŷd

Cadwch Gymru’n Daclus sy’n gweinyddu rhaglen Gwobr y Faner Werdd yng Nghymru, gyda chefnogaeth Llywodraeth Cymru. Gwirfoddolodd arbenigwyr annibynnol mewn mannau gwyrdd eu harbenigedd i werthuso’r ymgeiswyr yn erbyn meini prawf trwyadl megis bioamrywiaeth, glendid, rheolaeth amgylcheddol, a chyfranogiad cymunedol.

Am restr lawn enillwyr Gwobr y Faner Werdd eleni, ewch i https://keepwalestidy.cymru/cy.

Dywedodd y Cynghorydd Sirol Sara Burch, Aelod Cabinet dros Faterion Gwledig, Tai a Thwristiaeth Cyngor Sir Fynwy: “Mae gennym gyfoeth o fannau gwyrdd ac atyniadau gwych ledled Sir Fynwy.

“O ddiwrnodau allan i’r teulu i’r rhai sy’n chwilio am rywbeth sy’n canolbwyntio mwy ar natur neu weithgaredd, mae rhywbeth at ddant pawb.

“Rwy’n falch bod gwaith caled gwirfoddolwyr wedi cael ei wobrwyo unwaith eto gyda Gwobrau’r Faner Werdd.”

Dywedodd y Cynghorydd Sirol Catrin Maby, Aelod Cabinet dros Newid yn yr Hinsawdd a’r Amgylchedd: “Mae mor braf gweld bod llawer o’n lleoliadau yn sir hardd Sir Fynwy wedi derbyn gwobrau eleni.

“Mae’n wych gweld safleoedd o Hen Orsaf Tyndyrn i Ddolydd y Castell yn y Fenni wedi cael eu cydnabod gyda gwobrau’r Faner Werdd.”